O 4 de xullo A CLAQUE executou por terceira vez CANCIÓNS FALADAS, unha
acción poética da que nós dixemos:
1. CANCIÓNS FALADAS é un recital performativo, un diálogo pautado entre os
membros do Colectivo de Creación A CLAQUE Paula Carballeira
(escritora), Suso
Cortegoso (músico) e Manuel M. Romón (escritor) a través da
música e da palabra.
2. CANCIÓNS FALADAS é, tamén, unha confrontación a par entre os sons e os
textos recitados (algúns inéditos e outros publicados en “Alicia & Alicia”
e en “Et finira le jour de son commencement”).
3. CANCIÓNS FALADAS é, dalgunha maneira, un conxunto instrumental –no que
as voces son unha ferramenta máis- á procura dun ritmo, dunha respiración
común, onde os solos serven para salienta-las cadencias de cada quen.
4. En resumo, un “concerto”, unha “ofrenda musical”, unha “conversa”, todo
iso, entre outras lecturas posibles, é para nós CANCIÓNS FALADAS.
E da que non dixemos:
1. Obviamente CANCIÓNS FALADAS quere ser unha “tradución” –se acaso perversa-
da palabra alemá Sprechgesang.
2. O expresionismo en abstracto, a literatura de tradición oral, a arte povera, o minimalismo e Leonard
Cohen son algunhas das referencias que barallamos á hora de poñer en marcha
CANCIÓNS FALADAS.
3. En relación co título do recital, Suso Cortegoso suxeriu,
mentres desenvolviámo-lo proxecto, CANTARES GALLEGOS no canto de CANCIÓNS
FALADAS. A súa proposta nunca se chegou a votar.
4. Na súa versión actual CANCIÓNS
FALADAS lévanos 45 minutos ben a gusto.
Desta vez foi en Vigo, no Café Uf, e as fotos son de Rafael Ojea.