CAMBIO DE QUENDA
(Pequeno
drama carcerario)
Un espazo en penumbra. Nas paredes debúxanse luces e
sombras, enreixados, pechaduras. Hai de fondo un son incómodo e intermitente,
coma un zunido. De cando en vez, escóitase tusir a alguén, sempre o mesmo
tusido, enfermo. Pode escoitarse tamén alguén que canta entre dentes, ou uns
pasos que se achegan, ou marchan, ou desaparecen; ata que, de súpeto, sen
previo aviso, se instala o silencio.
Un silencio que pesa enriba das
costas, que infunde respecto. Unha
gaiola pendura do teito. Dentro da gaiola hai unha persoa. A gaiola está aberta
por abaixo, de tal xeito que á persoa prisioneira se lle vén as pernas e os
pés, espidos. Esa persoa canta, coma unha ladaíña que non lle deixa escoitar o
silencio do arredor. Abaixo hai dous gardas, iguais no xeito de vestir, en
complexión. Poderían ser o mesmo en apariencia, aínda que hai algo que os
distingue: teñen voces distintas, velocidades diferentes.
GARDA 1.- Sae.
PRISION..- Non!
GARDA 2.- Tes
que saír.
PRISION. .- Non!
GARDA 1.- Es
libre.
PRISION..- Non!
GARDA 2.- Si.
PRISION..- Quero
quedar aquí.
GARDA 1.- Es
libre.
PRISION..- Se
fose libre podería quedar.
GARDA 2.- É xusto o contrario.
GARDA 1.- Non
podes quedar aquí se es libre.
PRISION..- Que liberdade é esta?
Seguides dándome ordes.
GARDA 2.- Porque non fas o que tes
que facer.
PRISION..- Esa é a vosa opinión.
GARDA 1.- Marcha dunha vez.
PRISION..- Por que?
GARDA 2.- Precisamos o teu sitio
para outra persoa.
PRISION..- Que
máis ten!
GARDA 1.- O
espazo é un problema.
GARDA 2.- Non
hai moito espazo.
PRISION..- Eu
non ocupo moito espazo.
GARDA 1.- Ti
ocupas un espazo que xa non mereces.
GARDA 2.- Fóra!
PRISION..- Nin
sabedes como me chamo.
GARDA 1.- Sabemos
como te chamas.
PRISION..- Esquecedes
rápido.
GARDA 2.- Non
temos todo o día.
PRISION..- Eu
si que teño todo o día.
GARDA 1.- Problema teu.
PRISION..- Ninguén vai vir
buscarme.
GARDA 2.- Colle o bus.
PRISION..- Non vos parece
triste?
GARDA 1.- Desesperante.
PRISION..- Seguro que vós
tedes quen vos veña buscar ao acabar a xornada.
GARDA 2.- Nós imos no bus.
PRISION..- Seguro que tedes
familia.
GARDA 1.- Temos présa.
GARDA 2.- Marcha!.
PRISION..- Só sabedes dar ordes.
GARDA 1.- Ti só sabes desobedecer.
PRISION..- Por iso. Este é o meu
sitio. Non quero saír daquí. Para que?
GARDA 2.- Busca
un traballo.
PRISION..- Onde?
GARDA 1.- Busca
alguén que te manteña.
PRISION..- A
xente tenme medo.
GARDA 2.- Non
me estraña.
PRISION..- Por
que?
GARDA 1.- Dás
moitos problemas.
PRISION..- É
un delito dar problemas?
GARDA 2.- Depende
dos problemas.
PRISION..- Non
lembro por que estou aquí.
GARDA 1.- Nós si.
GARDA 2.- Mataches a alguén.
PRISION..- Ah, si!. Dábame moito
que pensar.
GARDA 1.- Non é excusa.
PRISION..- Gústame estar aquí, sen
pensar. Gústame que me organicedes a vida... Agora espertas, agora vas
almorzar, agora lle dás unha volta ao patio, agora fas exercicio... para que?,
para o corpo... agora vas xantar, agora vas para a túa cela descansar...
descansar de que?, de todo... agora vas aprender fontanería, ou carpintería, ou
electrónica, así podes volverte autosuficiente... para que?, para non
molestar... agora vas ler o capítulo dun libro, que é moi bo para o cerebro...
para que?, para o cerebro, para pensar, pero se non quero
pensar... agora horario
de visitas... para que?, para o cariño, pero se non vén ninguén. Pórtate ben...
para que?
GARDA 2.- Para saír de aquí.
PRISION..- Non quero. Non se pode
ser boa persoa.
GARDA 1.- Ti non es unha boa
persoa.
GARDA 2.- Mataches a alguén.
O ou a PRISION. cala. Silencio.
GARDA 1.- Calaches...
GARDA 2.- Por
fin...
GARDA 1.- Agora só tes que
marchar...
GARDA 2.- Xa dixeches o que tiñas
que dicir ...
GARDA 1.- Unha perda de tempo...
GARDA 2.- Por iso aprendimos a non
escoitar...
GARDA 1.- Despois de ti virá outra
persoa...
GARDA 2.- E tamén quererá falar...
GARDA 1.- Seguro...
GARDA 2.- Quererá chamar a
atención...
GARDA 1.- Seguro...
GARDA 2.- Que lle fagamos caso...
GARDA 1.- Diso se trata...
GARDA 2.- De non facervos caso...
GARDA 1.- Quen pensades que sodes?
GARDA 2.- Ninguén...
GARDA 1.- Sodes ninguén...
GARDA 2.- Sodes ninguén para
nós...
GARDA 1.- Sodes ninguén para o
resto...
GARDA 2.- Unha perda de tempo...
GARDA 1.- Iso é o que fas aquí...
GARDA 2.- Non te equivoques...
GARDA 1.- Estás aquí para perder o
tempo...
GARDA 2.- Para gastar minutos...
GARDA 1.- ...horas...
GARDA 2.- ...días...
GARDA 1.- ...anos...
GARDA 2.- Estás aquí para gastar o
tempo que che queda...
GARDA 1.- ...en
falar..
GARDA 2.- ...en
estar aquí...
GARDA 1.- Onde ninguén te
escoita...
GARDA 2.- Diso se trata...
GARDA 1.- De que aprendas a
calar...
GARDA 2.- Para que non se lembren
de ti...
GARDA 1.- Daquela poderás saír...
GARDA 2.- Cando soes coma os
demais...
GARDA 1.- Cando a túa voz sexa
coma as outras voces...
GARDA 2.- Ata que fagas algo que
chame a atención...
GARDA 1.- Porque te creas
diferente...
GARDA 2.- Daquela volverás...
GARDA 1.- Porque pensas que a túa
voz é importante...
GARDA 2.- E teremos que aturarte
outra vez...
GARDA 1.- Facer o noso traballo...
GARDA 2.- Finxir que escoitamos...
GARDA 1.- Finxir que estamos
xordos...
GARDA 2.- Ata que cales...
GARDA 1.- Por fin...
GARDA 2.- Pero xa está...
GARDA 1.- Acabouse...
GARDA 2.- Cambio de quenda...
GARDA 1.- Marchamos..
GARDA 2.- Aí quedas...
GARDA 1.- Chamando a atención...
GARDA 2.- Para que alguén che diga
algo...
GARDA 1.- O que tes que facer...
GARDA 2.- Unha orde...
GARDA 1.- Covarde...
GARDA 2.- Aquí obedeces...
GARDA 1.- Fóra non...
GARDA 2.- Fóra é todo máis
difícil...
GARDA 1.- Cambio de quenda...
GARDA 2.- Volverás...
GARDA 1.- Non aprendes...
GARDA 2.- Cambio de quenda...
PRISION..- É unha orde?
Silencio.
GARDA 1.- Sae.
PRISION..- Non!
GARDA 2.- Tes
que saír.
PRISION. .- Non!
GARDA 1.- Es
libre.
PRISION..- Non!
GARDA 2.- Si.
PRISION..- Quero
quedar aquí.
GARDA 1.- Es
libre.
PRISION..- Se
fose libre podería quedar.
GARDA 2.- É xusto o contrario.
GARDA 1.- Non
podes quedar aquí se es libre.
